കോഴിക്കോട്: റവന്യൂ പുറമ്പോക്ക് ഭൂമിയിൽ കരിങ്കൽ ഖനനം നടത്തുന്നതിന് എതിർപ്പില്ലാരേഖ (എൻ.ഒ.സി.) നൽകാനുള്ള തീരുമാനത്തിന്റെ ഭാഗമായി എല്ലാ ജില്ലകളിലും അനുയോജ്യമായ സ്ഥലം നിശ്ചയിച്ച് സർക്കാരിന് റിപ്പോർട്ട് നൽകാൻ കളക്ടർമാരെ ചുമതലപ്പെടുത്തി. 

റവന്യൂ പുറമ്പോക്കിൽ ഖനനം നടത്താൻ ടെൻഡർ നടപടികളിലേക്ക് നീങ്ങുന്നതിന് സമയക്രമം നിശ്ചയിച്ച് സംസ്ഥാനസർക്കാർ ഇറക്കിയ ഉത്തരവിന്റെ ഭാഗമായാണ് നടപടികൾ ദ്രുതഗതിയിൽ മുന്നേറുന്നത്. സർവേമാപ്പ് തയ്യാറാക്കി എവിടെയൊക്കെ ഖനനം നടത്താമെന്നു നിശ്ചയിക്കാൻ ആർ.ഡി.ഒ.യുടെ നേതൃത്വത്തിൽ ജില്ലാ ജിയോളജിസ്റ്റ്, തഹസിൽദാർ, താലൂക്ക് സർവേയർ, വില്ലേജ് ഓഫീസർ എന്നിവരടങ്ങുന്ന സംഘത്തെ കളക്ടർമാർ നിയോഗിച്ചിട്ടുണ്ട്. ഇവരുടെ റിപ്പോർട്ട് ലഭിച്ചാലുടൻ ഇ-ടെൻഡർ വഴി ലേലനടപടികൾ പൂർത്തിയാക്കും.

പാരിസ്ഥിതികപ്രശ്നങ്ങൾ ഉൾപ്പെടെ പഠിച്ചശേഷമാണ് ആർ.ഡി.ഒ.യുടെ നേതൃത്വത്തിലുള്ള സംഘം എൻ.ഒ.സി. നൽകാവുന്ന ഭൂമി നിശ്ചയിച്ച് കളക്ടർമാർക്ക് കഴിഞ്ഞദിവസം റിപ്പോർട്ട് സമർപ്പിച്ചത്. ഈ റിപ്പോർട്ട് കളക്ടർമാർ പരിശോധിച്ചശേഷം ടെൻഡർ നടപടികളിലേക്ക് കടക്കും. 

എൻ.ഒ.സി.യുടെ തറവില: ഹെക്ടറിന് 10 ലക്ഷം

ഖനനം നടത്താൻ 12 വർഷത്തേക്ക് എൻ.ഒ.സി. നൽകുന്നതിന് ഹെക്ടറിന് 10 ലക്ഷം രൂപയാണ് തറവിലയായി സർക്കാർ നിശ്ചയിച്ചത്. ഒരു ഹെക്ടറിന് താഴെയാണ് ഭൂമിയെങ്കിൽ ഫീസ് നിശ്ചയിച്ച് ക്വാറി പെർമിറ്റ് നൽകും. ലേലത്തിൽ ഏറ്റവും കൂടുതൽ പണം നൽകുന്നവർക്കാണ് കരാർ നൽകുക. 12 വർഷത്തേക്കുള്ള ലീസ് തുക ഓരോ വർഷവും നിശ്ചിത തുക എന്ന നിലയിൽ അടച്ചുതീർക്കണം. എൻ.ഒ.സി. തുക അടയ്ക്കുന്നതിന് പുറമേ ക്വാറിയിൽനിന്ന് ഖനനംചെയ്ത് എടുക്കുന്ന കരിങ്കല്ലിന് ടണ്ണിന് സർക്കാർ നശ്ചയിച്ചിട്ടുള്ള സിനിയറേജ് തുക വേറെയും കെട്ടണം. കരിങ്കൽ ഖനനത്തിനുള്ള അനുമതി ഇതാദ്യമായാണ് ടെൻഡർ നടപടികളിലൂടെ നൽകുന്നത്.