കണ്ണൂർ : റോഡുകൾ പരിസ്ഥിതി സൗഹൃദമാക്കുന്നതിന്‌ ‘ഗോ ഇലക്‌ട്രിക്’ ക്യാമ്പയിനുമായി ഊർജ്ജ വകുപ്പ്‌. അടുത്ത വർഷത്തോടെ സംസ്ഥാനത്തെ റോഡുകളിൽ പത്തുലക്ഷം ഇലക്‌ട്രിക്‌ വാഹനങ്ങൾ എത്തിക്കുന്നതിനാണ്‌ സർക്കാർ ലക്ഷ്യമിടുന്നത്. ഇലക്‌ട്രിക്‌ വാഹനങ്ങൾ പ്രോത്സാഹിപ്പിക്കുന്നതിന്‌ സബ്‌സിഡിയടക്കമുള്ള ആനുകൂല്യങ്ങളുമുണ്ടാകും. ക്യാമ്പയിന്‌ ബുധനാഴ്‌ച തുടക്കമാകും. എനർജി മാനേജ്‌മെന്റ് സെന്ററിന്റെ നേതൃത്വത്തിലാണ്‌ ഒരുവർഷം നീളുന്ന ക്യാമ്പയിൻ. ആദ്യഘട്ടത്തിൽ രണ്ടുലക്ഷം ഇരുചക്രവാഹനങ്ങൾ, അരലക്ഷം ഓട്ടോറിക്ഷ, ആയിരം ചരക്കുവണ്ടി, മൂവായിരം ബസ്‌, 100 ബോട്ട്‌ എന്നിവയാണ്‌ ലക്ഷ്യം. വീടുകളിൽനിന്നുതന്നെ ചാർജ്‌ ചെയ്യാമെന്നതിനാൽ ഇരുചക്രവാഹനങ്ങളാണ്‌ ആദ്യഘട്ടത്തിൽ കൂടുതൽ ജനങ്ങളിലെത്തിക്കുക.

കേരളത്തിൽ ഇലക്‌ട്രിക്‌ ബൈക്കുകൾ ലഭ്യമല്ല. അടുത്തമാസത്തോടെ സാങ്കേതിക നടപടിക്രമങ്ങൾ പൂർത്തിയാക്കി ബൈക്കുകളും ലഭ്യമാക്കും. അറുപതിനായിരം മുതൽ 1.25 ലക്ഷംവരെ വിലയുള്ള ഇലക്‌ട്രിക്‌ ഇരുചക്രവാഹനങ്ങളാണ്‌ സബ്‌സിഡി നിരക്കിൽ ലഭ്യമാവുക. കൺവെർജെൻസ് എനർജി സർവീസസ്‌ ലിമിറ്റഡുമായി ചേർന്നാണ്‌ പദ്ധതി നടപ്പാക്കുന്നത്‌. ഇതുവഴി വാഹനങ്ങളുടെ ഗുണമേന്മയും ഉറപ്പാക്കാനാകും.
പെട്രോൾ – ഡീസൽ വിലവർധനയുടെ ദുരിതത്തിൽനിന്ന്‌ രക്ഷപ്പെടാൻ ബദൽ മാർഗത്തെക്കുറിച്ചുള്ള വിപുലമായ ബോധവൽക്കരണമാണ്‌ ക്യാമ്പയിനിലൂടെ ലക്ഷ്യമിടുന്നത്‌.

പെട്രോൾ ഇരുചക്രവാഹനങ്ങൾക്ക്‌ കിലോമീറ്ററിന്‌ രണ്ടുരൂപ ചെലവു വരുമ്പോൾ ഇലക്‌ട്രിക്‌ ഇരുചക്രവാഹനങ്ങൾക്ക്‌ 25 പൈസയേ ചെലവാകൂ. കേന്ദ്രസർക്കാർ പദ്ധതി പ്രകാരമാണ്‌ സബ്‌സിഡി അനുവദിക്കുന്നത്‌. ബാറ്ററി കപ്പാസിറ്റി അനുസരിച്ച്‌ 27 മുതൽ 47 ശതമാനംവരെ സബ്‌സിഡി ലഭിക്കും.
സർക്കാർ വകുപ്പുകളിലടക്കം ഇലക്‌ട്രിക്‌ വാഹനങ്ങൾ ഉപയോഗിച്ചുതുടങ്ങി. സർക്കാർ വകുപ്പുകൾക്കും സ്ഥാപനങ്ങൾക്കും ഇലക്ട്രിക് കാറുകൾ വാടകയ്ക്ക് നൽകാൻ അനർട്ട്‌ പദ്ധതിയൊരുക്കിയിട്ടുണ്ട്‌.

ഒറ്റത്തവണ ചാർജിങ്ങിലൂടെ 120 മുതൽ 450 കിലോമീറ്റർ വരെ ഓടാനാവുന്ന, വിവിധ മോഡലുകളിലുള്ള കാറുകളാണ് കരാർ വ്യവസ്ഥയിൽ നൽകുന്നത്. സർക്കാരിന്റെ ഇ – മൊബിലിറ്റി പദ്ധതിയുടെ നോഡൽ ഏജൻസികൂടിയാണ്‌ അനർട്ട്‌. പദ്ധതിയുടെ ഭാഗമായി തിരുവനന്തപുരം, കൊല്ലം, എറണാകുളം, കോഴിക്കോട്‌, കണ്ണൂർ ജില്ലകളിൽ കെഎസ്‌ഇബി സബ്‌സ്‌റ്റേഷനുകളിൽ ചാർജിങ്‌ സ്‌റ്റേഷനുകളും ഒരുങ്ങി. സംസ്ഥാനത്ത്‌ അറുപതോളം കേന്ദ്രങ്ങളിൽ ചാർജിങ് സ്‌റ്റേഷനുകൾ ഒരുക്കും. കെ.എസ്‌.ഇ.ബി.ക്ക്പുറമെ അനർട്ടും ചാർജിങ് സ്‌റ്റേഷനുകൾ സജ്ജമാക്കും.