തിരുവനന്തപുരം: കൊവിഡിന്റെ മൂന്നാം തരംഗ സാദ്ധ്യത നിലനിൽക്കുന്നതിനാൽ സംസ്ഥാനത്ത് വാക്സിനേഷൻ പരമാവധി വർദ്ധിപ്പിക്കാൻ ആരോഗ്യമന്ത്രിയുടെ നേതൃത്വത്തിൽ ചേർന്ന ഉന്നതതല യോഗം തീരുമാനിച്ചു. 18 വയസിന് മുകളിലുള്ള എല്ലാവർക്കും കുറഞ്ഞത് ഒരു ഡോസ് വാക്സിനെങ്കിലും സെപ്തംബർ അവസാനത്തോടെ നൽകിയിരിക്കണമെന്ന് ആരോഗ്യമന്ത്രി വീണാ ജോർജ് നിർദേശിച്ചു. ഇതിന് വേണ്ടി ഓരോ ജില്ലകളിലും വ്യക്തമായ പ്ലാൻ തയ്യാറാക്കി വാക്സിനേഷൻ ഡ്രൈവ് ശക്തിപ്പെടുത്തുന്നതാണ്. അവധി ദിവസങ്ങളിൽ വാക്സിനേഷൻ അളവ് കുറവായിരുന്നുവെന്നും വരും ദിവസങ്ങളിൽ ഇത് ശക്തിപ്പെടുത്തണമെന്നും യോഗം വിലയിരുത്തി.

സംസ്ഥാനത്ത് കൊവിഡ് പരിശോധനകളുടെ എണ്ണം വർദ്ധിപ്പിക്കാനും യോഗം തീരുമാനിച്ചു. ദിവസവും ചുരുങ്ങിയത് രണ്ട് ലക്ഷം പരിശോധനകളെങ്കിലും നടത്താനാണ് തീരുമാനം. കൊവിഡ് വ്യാപനം കണക്കിലെടുത്ത് സമ്പർക്ക പട്ടിക തയാറാക്കുന്നത് കർശനമാക്കാനും പൊതുചടങ്ങുകളില്‍ പങ്കെടുത്തവരില്‍ ആര്‍ക്കെങ്കിലും രോഗം വന്നാല്‍ മുഴുവന്‍ പേരേയും പരിശോധിക്കാനും യോഗത്തിൽ തീരുമാനമായി. രോഗ ലക്ഷണങ്ങളുള്ളവരും സമ്പര്‍ക്കത്തിലുള്ളവരും നിര്‍ബന്ധമായും കോവിഡ് പരിശോധന നടത്തണമെന്നും നിർദേശമുയർന്നു. നിലവിൽ സംസ്ഥാനത്ത് ആവശ്യത്തിന് ഓക്സിജന്റെ കരുതൽ ശേഖരമുണ്ടെന്നും ആവശ്യമായി വന്നാൽ കർണാടകയെ ആശ്രയിക്കാവുന്നതാണെന്നും യോഗം വിലയിരുത്തി. ആശുപത്രികളിലെ തീവ്ര പരിചരണ വിഭാ​ഗങ്ങൾ കൂടുതൽ ശക്തിപ്പെടുത്തും. കുഞ്ഞുങ്ങൾക്കായുള്ള ഐ.സി.യു സംവിധാനങ്ങളും പൂർണതോതിൽ സജ്ജമാക്കി വരികയാണെന്നും അറിയിച്ചു.