തലശ്ശേരി : സ്ഥാപനങ്ങളെല്ലാം തുറന്ന് പ്രവർത്തിക്കുമ്പോഴും ഹോട്ടലുകളിലും, റസ്റ്റോറൻ്റുകളിലും മാത്രം കടുത്ത നിയന്ത്രണങ്ങൾ അടിച്ചേൽപിക്കുന്നത് നീതീകരിക്കാനാവില്ലെന്ന് കേരള ഹോട്ടൽ ആൻറ് റസ്റ്റോറൻ്റ് അസോസിയേഷൻ കണ്ണൂർ ജില്ലാ കമ്മിററി.എല്ലാ ഹോട്ടലുകളിലും കോവിഡ് മാനദണ്ഡം പാലിച്ച് ആളുകളെ കയറ്റാനും ഭക്ഷണം നൽകാനും അനുവദിക്കണമെന്നും, ഈ ആവശ്യമുന്നയിച്ച് തദ്ദേശ സ്വയംഭരണ സ്ഥാപനങ്ങൾക്ക് മുന്നിൽ സംസ്ഥാനത്തുടനീളം ധർണാ സമരം നടത്തുമെന്നും അസോസിയേഷൻ ഭാരവാഹികൾ തലശേരിയിൽ പത്രസമ്മേളനത്തിൽ അറിയിച്ചു.

ഹോട്ടൽ മേഖല കനത്ത പ്രതിസന്ധിയിലാണുള്ളത്.അന്യായമായ ജി.എസ്.ടി. നികുതി ചുമത്തലും പ്രകൃതിദുരന്തങ്ങളും കോവിഡ് മഹാമാരി വ്യാപന ഭീതിയും കാരണം ഹോട്ടലുകളുടെ നിലനിൽപ് തന്നെ അപകടത്തിലാണ്.പാചക വാതകത്തിൻ്റെ വിലക്കയറ്റം കൂനിന്മേൽ കുരുപോലെ അസഹനീയമായിട്ടുണ്ട്.അതിജീവന വഴിയിൽ പ്രയാസപ്പെടുന്ന ഹോട്ടൽ ഉടമകളെ സഹായിക്കാൻ സർക്കാർ തയ്യാറാവണം.

ചുരുങ്ങിയ പക്ഷം എല്ലാ ഹോട്ടലുകളിലും കോവിഡ് മാനദണ്ഡം പാലിച്ച് ആളുകളെ കയറ്റാനുംഇരുത്തി ഭക്ഷണം നൽകാനും അനുവദിക്കണം. പ്രശ്നങ്ങളും പ്രയാസങ്ങളും ചൂണ്ടിക്കാട്ടി കെ.എച്ച്.ആർ.എ.യുടെ ആഹ്വാന പ്രകാരം കേരളത്തിലെ മുഴുവൻ തദ്ദേശ സ്വയംഭരണ സ്ഥാപനങ്ങൾക്ക് മുന്നിലും ഹോട്ടലുടമകൾ പ്രകടനവും ധർണ്ണയും നടത്തുകയാണ്. ഇതിൻ്റെ ഭാഗമായി തലശ്ശേരി നഗരസഭ ഓഫിസിന് മുന്നിലും ധർണ്ണ സമരം സംഘടിപ്പിക്കുമെന്ന് നേതാക്കൾ അറിയിച്ചു.ജില്ലാ പ്രസിഡണ്ട് കെ.അച്യുതൻ,ജില്ലാ വർക്കിംഗ് പ്രസിഡണ്ട് കെ.പി .ഷാജി പൊന്യം കഫെ , ജില്ലാ കമ്മിററിയംഗം നാസർ ജൂബിലി എന്നിവർ വാർത്താസമ്മേളനത്തിൽ പറഞ്ഞു.