മലയാളസിനിമയിൽ വേഷം നൽകാമെന്ന് പറഞ്ഞ് ജൂനിയർ ആർട്ടിസ്റ്റുകളെ പറ്റിക്കുന്ന സംഘം സംസ്ഥാനത്ത് സജീവം. കോഴിക്കോട് സ്വദേശിയായ യുവതിയിൽ നിന്ന് ഇരുപത്തി അയ്യായിരം രൂപ തട്ടിയെടുത്തു. മഞ്ജു വാര്യർക്കൊപ്പം തുല്യ പ്രധാനമുള്ള റോൾ എന്ന് പറഞ്ഞാണ് പറ്റിച്ചത്. ഇടുക്കി കേന്ദ്രീകരിച്ച് പോലീസ് അന്വേഷണം ന‌ടത്തും.

കണ്ണീരും കിനാവും എന്നാണ് സിനിമയുടെ പേരായി പറഞ്ഞിരുന്നത്. പ്രധാന കഥാപാത്രങ്ങളായി ഉണ്ണി മുകുന്ദനും മഞ്ജു വാര്യരും. കോഴിക്കോട് ജില്ലയിലെ മുക്കം മണാശ്ശേരി സ്വദേശിയായ നളിനി എന്ന ജൂനിയർ ആർട്ടിസ്റ്റിനെ തട്ടിപ്പുസംഘം വലയിലാക്കിയത് ഈ സിനിമയിൽ അഭിനയിപ്പിക്കാം എന്നുപറഞ്ഞാണ്. സീരിയൽ ചർച്ചകൾക്കായുണ്ടാക്കിയ വാട്ട്സാപ്പ് ​ഗ്രൂപ്പിൽ നിന്ന് പരിചയപ്പെട്ട സ്ത്രീയാണ് വേഷം വാ​ഗ്ദാനം ചെയ്തത്. ഇടുക്കിയിലെ ചേലച്ചുവട് എന്ന സ്ഥലത്തേക്ക് വിളിച്ചുവരുത്തി. അവിടെ സിനിമയിലുള്ളവരെന്ന് പറഞ്ഞ് നാലം​ഗസംഘത്തെ പരിചയപ്പെടുത്തി.

മഞ്ജു വാര്യരുടെ അമ്മ വേഷമായിരുന്നു വാ​ഗ്ദാനം. അമ്പതിനായിരം രൂപയാണ് ആദ്യം ചോദിച്ചത്. 25,000 രൂപ പല ഘട്ടങ്ങളിലായി നൽകി. അങ്ങനെ ഒരു സിനിമയേ ഇല്ലെന്ന് മനസിലാക്കിയപ്പോഴേക്കും വൈകിയിരുന്നു. ഇടുക്കി സ്വദേശികളായ സിബി, മേരിക്കുട്ടി എന്നിവരടക്കം അഞ്ചുപേർക്കെതിരെ മുക്കം പോലീസിൽ പരാതി നൽകിയിരിക്കുകയാണ് നളിനി.