ഇരിട്ടി : താലൂക്ക് ആശുപത്രി ലക്ഷ്യ മാതൃശിശു ബ്ലോക്ക് ഉദ്ഘാടനം കഴിഞ്ഞ് അഞ്ചു മാസം പിന്നിട്ടിട്ടും അടഞ്ഞുതന്നെ.മൂന്ന് കോടി 19 ലക്ഷം രൂപ ഉപയോഗിച്ച് ആധുനിക സൗകര്യങ്ങളോടെ പണി പൂർത്തിയാക്കിയ വിഭാഗമാണ് ആസ്പത്രി അധികൃതരുടെ അനാസ്ഥ മൂലം അടഞ്ഞു കിടന്ന് നശിക്കുന്നത്.

2019-ൽ ആദ്യം നിർമ്മിച്ച മാതൃ ശിശുവാർഡ് മാസങ്ങൾ കഴിഞ്ഞപ്പോൾ ആശുപത്രിയുടെ ഒ പി വാർഡും , ഫാർമസിയും , ഡയാലിസിസ് സെന്ററും മറ്റുമായി മാറ്റുകയായിരുന്നു.പ്രസവം നടത്താൻ ആശുപത്രി അധികൃതർ തയ്യാറാവത്തതിനാൽ ഇവിടേക്ക് നിയമിച്ച ഗൈനക്കോളജിസ്റ്റുകൾ പേരാവൂർ താലൂക്ക് ആശുപത്രിയിലേക്കും മറ്റും സ്ഥലം മാറി പോവുകയും ചെയ്തു.
പിന്നീട് 2020-ൽ ദേശീയ ആരോഗ്യ ദൗത്യത്തിന്റെ ഫണ്ടുപയോഗിച്ച് മുൻപ് മാതൃ ശിശു വാർഡ് പണിത അതേ കെട്ടിടത്തിന്റെ മുകളിൽ പുതുതായി മാതൃ ശിശു ബ്ലോക്ക് നിർമ്മിക്കുകയായിരുന്നു.ഒരാഴ്ചക്കുള്ളിൽ ആവശ്യമായ ഡോക്ടർമാരെയും സ്റ്റാഫുകളെയും നിയമിക്കുമെന്നും ഇനിയാരും മലയോര മേഖലകളിൽ നിന്നും പ്രസവത്തിനും അനുബന്ധ ചികിത്സകൾക്കുമായി എങ്ങും പോകേണ്ടിവരില്ല എന്ന ഉറപ്പും ഉദ്ഘാടന വേളയിൽ അധികൃതർ നൽകയും ചെയ്തു.

പ്രസവമുറി , ഓപ്പറേഷൻ മുറി, തീവ്ര പരിചരണ യൂണിറ്റ് , നവജാത ശിശു ഐസിയു, സ്ത്രീകൾക്കും കുട്ടികൾക്കുമുള്ള വാർഡുകൾ, ഇതിലെ ഉപകരണങ്ങൾ എന്നിവയെല്ലാം നാശത്തിലേക്ക് നീങ്ങുന്ന അവസ്ഥയാണ് ഇപ്പോൾ.

1958ൽ റൂറൽ ഡിസ്പെന്സറിയായി ആരംഭിച്ച് പി എച്ച് സി യും , സി എച്ച് സി യും മറ്റുമായി ഉയർത്തിക്കൊണ്ടുവന്ന, മൂന്ന് പതിറ്റാണ്ടോളം പ്രസവങ്ങൾ നടക്കുകയും അനുബന്ധ ചികിത്സകൾ നടത്തുകയും ചെയ്ത ഇരിട്ടി താലൂക്കാസ്പത്രിയിൽ യാതൊരു സൗകര്യവുമില്ലാതിരുന്ന അക്കാലത്ത് ഒന്നോ രണ്ടോ ഡോക്ടർമാർ മാത്രമായിരുന്നു സേവനം നടത്തിയത്.പരിമിതമായ സൗകര്യങ്ങളിലായിരുന്നു ഹോസ്പിറ്റൽ പ്രവർത്തിച്ചു വന്നിരുന്നത്.കമ്മ്യൂണിറ്റി ഹെൽത്ത് സെന്ററിൽ നിന്നും താലൂക്ക് ആശുപത്രിയായി വളരുകയും കൂടുതൽ ഡോക്ടർമാരും സൗകര്യവും ഉണ്ടാവുകയും ചെയ്തതോടെ സ്ത്രീകളേയും ഗർഭിണികളെയും തീരേ അവഗണിക്കുന്ന അവസ്ഥയിലേക്ക് ആശുപത്രി മാറി.മികച്ച രീതിയിൽ ആസ്പത്രിയെ നയിക്കാൻ ആരുമില്ല എന്നതാണ് ഇരിട്ടി താലൂക്കാസ്പത്രിയുടെ ദുർഗതി.

ഇരിട്ടിയിൽ സ്വകാര്യ ആശുപത്രികൾ കിളിർത്ത് വളരാൻ കാരണം താലൂക്കാസ്പത്രി അധികൃതരുടെ അനാസ്ഥ കൊണ്ടാണ്.സ്വകാര്യ ആശുപത്രികൾക്കുവേണ്ടി സർക്കാർ ആശുപത്രികളെ കൊല്ലുന്ന അവസ്ഥയാണ് ഉണ്ടാകുന്നതെന്ന ജനാഭിപ്രായം സത്യമാണെന്നാണ് ഇവിടേയും പറയേണ്ടി വരിക.