ചെറുകുന്ന് : പൊതുശ്മശാനത്തിലെ തരിശുഭൂമിയിൽ വനവത്‌കരണം നടത്തി വിസ്മയം തീർത്തിരിക്കുകയാണ് കെ. കണ്ണപുരം എൽ.പി. സ്കൂൾ വിദ്യാഥികളും രക്ഷിതാക്കളും.

പിലാത്തറ-പാപ്പിനിശ്ശേരി കെ.എസ്.ടി.പി. റോഡ് വികസനത്തിന്റെ ഭാഗമായി സ്കൂൾ പറമ്പിലെ തണൽമരങ്ങൾ മുറിച്ചുമാറ്റുകയും സമീപപ്രദേശത്തുള്ള തണൽമരങ്ങളൊക്കെ നഷ്ടപ്പെടുകയും ചെയ്ത സന്ദർഭത്തിലാണ് കെ. കണ്ണപുരം ശ്മശാന കമ്മിറ്റിയുടെ കീഴിലുള്ള തരിശുസ്ഥലത്ത് വനവത്‌കരണം നടത്തണമെന്ന ആശയം പി.ടി.എ. കമ്മിറ്റിയിൽ ചർച്ചചെയ്തത്. 

നാട്ടുകാരെ സഹകരിപ്പിച്ച് 2011 ഓഗസ്റ്റിൽ പ്രാരംഭപ്രവർത്തനം തുടങ്ങി. 40 സെൻറ് തരിശുഭൂമിയിൽ നൂറോളം മരങ്ങളുടെ തൈകൾ കണ്ണവം ഫോറസ്റ്റിൽനിന്ന്‌ സംഘടിപ്പിച്ച് വിദ്യാർഥികളും രക്ഷിതാക്കളും ചേർന്ന് നട്ടു. 2013-ലെ പരിസ്ഥിതിദിനത്തിൽ വനവത്‌കരണത്തിന്റെ ഉദ്ഘാടനം നടത്തി. തേക്ക്, കനി, നെല്ലി എന്നീ മരങ്ങളാണ് നട്ട് പിടിപ്പിച്ചത്.

പൂഴിപ്രദേശമായതിനാൽ വേനൽകാലത്ത് മരങ്ങളെ നിലനിർത്തുക വലിയ വെല്ലുവിളിയായിരുന്നു. എങ്കിലും വിദ്യാർഥികളോടൊപ്പം പി.ടി.എ. കമ്മിറ്റി അംഗങ്ങളായ എം.ജയൻ, ടി.ഇ. പവിത്രൻ എന്നിവർ കൃത്യമായി വെള്ളമൊഴിച്ച് ചെടികളെ സംരക്ഷിച്ചു വളർത്തി. ഇന്ന് ആ ചെടികളൊക്കെ വളർന്ന് തണൽ നൽകുന്ന മുഴുനീളവനമായി മാറി, പ്രദേശം സുന്ദരമായി. വെള്ളിയാഴ്ച നടന്ന ചടങ്ങിൽ അന്ന് മരം നട്ട വിദ്യാർഥികൾ പുതിയ തലമുറയ്ക്ക് ഫലവൃക്ഷത്തൈകൾ കൈമാറി. ഫലവൃക്ഷത്തൈകൾ കല്യാശ്ശേരി ബ്ലോക്ക് പഞ്ചായത്ത് പ്രസിഡന്റ് പി.പി. ഷാജിർ വിദ്യാർഥികൾക്ക് കൈമാറി.