തിരുവനന്തപുരം: വട്ടപ്പാറയില്‍ യുവതിയുടെ ആത്മഹത്യയില്‍ ദുരൂഹതയെന്ന ആരോപണവുമായി വീട്ടുകാര്‍. അന്തരിച്ച നടൻ രാജന്‍ പി.ദേവിന്റെ മകൻ ഉണ്ണിയാണ് യുവതിയുടെ ഭർത്താവ്. മാനസിക–ശാരീരിക പീഡനമാണ് ജീവനൊടുക്കാന്‍ കാരണമെന്ന് മരിച്ച പ്രിയങ്കയുടെ സഹോദരന്‍ വിഷ്ണു ആരോപിച്ചു. രണ്ടുദിവസം മുന്‍പാണ് പ്രിയങ്കയെ വീട്ടില്‍ തൂങ്ങിമരിച്ച നിലയില്‍ കണ്ടെത്തിയത്. 

യുവതി തന്നെ പരാതി നൽകിയിരുന്നെന്നും സഹോദരൻ വെളിപ്പെടുത്തി. ശരീരത്തിൽ മർദിച്ച പാടുകൾ ഉണ്ടെന്ന് പരാതിയിൽ പറയുന്നു. ‘അനിയത്തി വിളിച്ചത് അനുസരിച്ച് താൻ ചെന്ന് വിളിച്ച് കൊണ്ടുവരികയായിരുന്നു. അന്ന് വൈകിട്ടുതന്നെ വട്ടപ്പാറയിലെ സ്റ്റേഷനിൽ ചെന്ന് പരാതി നൽകി. പിറ്റേന്നാണ് ആത്മഹത്യ ചെയ്തത്. മുറിവിൽ കടിച്ച പാടും നീരും ഒക്കെ അവൾ കാണിച്ച് തന്നിരുന്നു’ – വിഷ്ണു പറയുന്നു.

അസ്വാഭാവിക മരണത്തിന് പൊലീസ് കേസെടുത്തിട്ടുണ്ട്. തിരുവനന്തപുരം മെഡിക്കൽ കോളജിൽ മൃതദേഹം പോസ്റ്റ്മോർട്ടം ചെയ്യും. അതിനുശേഷം തുടർനടപടിയുണ്ടാകുമെന്ന് വട്ടപ്പാറ സി.ഐ. അറിയിച്ചു. ഒന്നര വർഷം മുൻപായിരുന്നു വിവാഹം. അങ്കമാലിയിൽ ആയിരുന്നു ഇവർ വിവാഹ ശേഷം ജീവിച്ചിരുന്നത്. നാല് – അഞ്ച് മാസമേ ആയിട്ടുള്ളൂ ഇത്തരത്തിൽ ഉപദ്രവം തുടങ്ങിയിട്ടെന്നാണ് ബന്ധുക്കൾ പറയുന്നത്.

പണം ആവശ്യപ്പെട്ടും മറ്റുമായിരുന്നു ഉപദ്രവം തുടങ്ങിയത്. ഇക്കഴിഞ്ഞ 10നാണ് അങ്കമാലിയിലെ വീട്ടിൽനിന്ന് പ്രിയങ്ക സഹോദരനെ വിളിച്ചത്. ഉപദ്രവിക്കുന്നുവെന്നും ഇറക്കിവിടുന്നുവെന്നും വിളിച്ച് പരാതി പറഞ്ഞു. തന്നെ കൂട്ടിക്കൊണ്ടുപോകണം എന്നും ആവശ്യപ്പെട്ടു. 11ാം തീയതി രാവിലെ തന്നെ സഹോദരൻ എത്തി പ്രിയങ്കയെ കൂട്ടിക്കൊണ്ടുവന്നു. വരുന്നവഴിയാണ് വട്ടപ്പാറ പൊലീസിൽ പരാതി നൽകിയത്. 

ഇത്തരത്തിൽ ഉപദ്രവിക്കുന്നതായി അങ്കമാലി പൊലീസിലും 10ാം തീയതി അറിയിച്ചിരുന്നു. അവർ വീട്ടിലെത്തി കാര്യങ്ങൾ പറഞ്ഞുതീർത്തിരുന്നു. ഇതിനു പിന്നാലെയാണ് സഹോദരന്റെ കൂടെ പ്രിയങ്ക പോന്നത്. 12നാണ് ഉച്ചയോടെ വീട്ടിലെ മുറിയിൽ യുവതിയെ മരിച്ചനിലയിൽ കണ്ടെത്തിയത്.

മാനസിക, ശാരീരിക ഉപദ്രവങ്ങളാണ് യുവതിയുടെ ആത്മഹത്യയിലേക്ക് നയിച്ചതെന്നാണ് കുടുംബം പരാതിയിൽ പറയുന്നത്. പരാതി നൽകിയതിനെത്തുടർന്ന് പ്രിയങ്കയും ഭർത്താവ് ഉണ്ണിയും തമ്മിൽ ഫോണിൽ സംസാരിച്ചിരുന്നോ എന്ന കാര്യത്തിൽ വീട്ടുകാർക്ക് സംശയം ഉണ്ട്. ഇത്തരത്തിൽ ഭീഷണിയുണ്ടായതുകൊണ്ടാണോ പ്രിയങ്ക ആത്മഹത്യ ചെയ്തതെന്നാണ് സംശയം ഉയരുന്നത്.