കണ്ണൂർ: രാജ്യത്തെ ആദ്യ അറവുമാലിന്യവിമുക്ത സംസ്ഥാനമാക്കി കേരളത്തെ മാറ്റാനുള്ള പദ്ധതിക്ക് മലിനീകരണ നിയന്ത്രണ ബോർഡിന്റെ പുതിയ മാർഗരേഖ തിരിച്ചടിയാകുമെന്ന് പരാതി. ഈ മാർഗരേഖ ഹരിത കേരള മിഷന്റെതിന് നേർവിപരീതം. അറവുമാലിന്യം പന്നികൾക്ക് കൊടുക്കരുതെന്ന മലിനീകരണ നിയന്ത്രണ ബോർഡ് മാർഗരേഖ അവർതന്നെ തിരുത്തിയതാണ് വിഷയം. പന്നിഫാമുകാർ മലിനീകരണ നിയന്ത്രണ ബോർഡ് ചെയർമാനെ ഉപരോധിച്ചതിനെത്തുടർന്നാണ് നേരത്തെയിറക്കിയ മാർഗരേഖയിൽ വെള്ളംചേർത്തത്. അറവുമാലിന്യം പന്നിഫാമുകൾക്ക് നൽകരുതെന്നാണ് ഹരിത കേരള മിഷന്റെയും നിലപാട്. പന്നി ഫാമുകൾക്ക് നൽകാനെന്ന പേരിൽ ശേഖരിക്കുന്ന മാലിന്യമാണ് പൊതുവഴികളിലും ജലാശയങ്ങളിലും തള്ളുന്നതെന്നാണ് ഹരിത കേരള മിഷന്റെ കണ്ടെത്തൽ. അറവുകേന്ദ്രങ്ങളിലെ മാലിന്യം പണം വാങ്ങി ശേഖരിച്ച് പൊതുസ്ഥലത്ത് തള്ളുന്ന വൻ റാക്കറ്റ് പ്രവർത്തിക്കുന്നുണ്ടെന്നും മിഷൻ കണ്ടെത്തി.

സംസ്ഥാനത്ത് 455 പന്നിഫാമുകൾക്കാണ് മലിനീകരണനിയന്ത്രണ ബോർഡിന്റെ അംഗീകാരമുള്ളത്. ഇതിൽ 37,571 പന്നികളെ വളർത്താനാണ് അനുമതി. എന്നാൽ മൃഗസംരക്ഷണവകുപ്പിന്റെ കണക്കനുസരിച്ച് ഒന്നേകാൽലക്ഷം പന്നികളുണ്ട്. ബാക്കിയെല്ലാം അനധികൃതമെന്ന് വ്യക്തം.

പഞ്ചായത്തീരാജ് ഫാം ലൈസൻസിങ് ചട്ടം 2011 അനുസരിച്ച് ഒരു പന്നിയെ വളർത്താൻ രണ്ടുസെന്റ് എന്ന തോതിൽ സ്ഥലവിസ്തീർണം വേണം. ഒരു പന്നിക്ക് 50 ലിറ്റർ എന്ന തോതിൽ ജല ഉപയോഗം കണക്കാക്കി 200-ന് മുകളിൽ പന്നികളെ വളർത്തുന്ന ഫാമിൽ ബയോഗ്യാസ് പ്ലാന്റും സ്ഥാപിക്കണം. ഹോട്ടലിലെ മിച്ചഭക്ഷണം ശേഖരിക്കുന്ന പന്നിഫാമുകൾ ശേഖരിക്കുന്ന കടയുടെ മേൽവിലാസം, ടെലിഫോൺ നമ്പർ എന്നിവയും അപേക്ഷയോടൊപ്പം നൽകണം.

അറവുമാലിന്യം സംസ്കരിച്ച് ജൈവവളമാക്കുന്നതിന് ഹരിത കേരള മിഷൻ മുൻകൈയെടുത്ത് സ്ഥാപിച്ച സംസ്കരണകേന്ദ്രങ്ങൾ പ്രവർത്തിക്കുന്നുണ്ട്.

പന്നികർഷകർ മാലിന്യം ശേഖരിക്കാൻ തുടങ്ങിയതോടെ പല ജില്ലകളിലും സംസ്കരണ പ്ലാന്റുകൾക്ക് മാലിന്യം കിട്ടാതായി. നിയമവിധേയമല്ലാത്ത കോഴിമാലിന്യക്കടത്ത് തടയാനുള്ള നടപടി ശക്തമാക്കിയപ്പോഴാണ് പന്നികർഷകരുടെ സംഘടന കോഴിഅറവുമാലിന്യം പന്നികൾക്ക് തീറ്റയായി നൽകിവരുന്നതാണെന്നും അത് ലഭ്യമാക്കണമെന്നും ആവശ്യപ്പെട്ട് രംഗത്തെത്തിയത്. മിക്ക ജില്ലകളിലും ഭക്ഷണമാലിന്യങ്ങളുടെ 80 ശതമാനവും പന്നിഫാമുകളിലേക്കാണ് പോകുന്നത്. പന്നിഫാമുകൾ കോഴിമാലിന്യത്തെ ആശ്രയിച്ചാൽ ഹോട്ടലിലെ മിച്ചഭക്ഷണമാലിന്യം പ്രശ്നമായി മാറുമെന്നും ചൂണ്ടിക്കാണിക്കുന്നു.

കോഴിമാലിന്യത്തിന്റെ പ്രധാന ഭാഗമാണ് തൂവൽ. ഇത് പന്നികൾ ഭക്ഷിക്കാറില്ല. പന്നിഫാമുകളിലേക്ക് കോഴിമാലിന്യത്തോടൊപ്പം വൻതോതിൽ പ്ലാസ്റ്റിക് മാലിന്യവും എത്തിച്ചേരുന്നതായി ഹരിത കേരള മിഷൻ റിപ്പോർട്ട് ചെയ്തിട്ടുണ്ട്. മലിനീകരണ നിയന്ത്രണ ബോർഡിന്റെ പുതിയ തീരുമാനത്തിനെതിരേ ഹരിത ട്രിബ്യൂണലിൽ പരാതി നൽകുമെന്ന് സംസ്കരണകേന്ദ്രം ഉടമകൾ പറയുന്നു.