തിരുവനന്തപുരം : ഈ വർഷത്തെ എസ് എസ്എൽസി പരീക്ഷകൾക്കിനി മണിക്കൂറുകൾമാത്രം. 4,26,999 കുട്ടികളാണ് നാളെ തുടങ്ങുന്ന എസ്.എസ്.എല്‍.സി  പരീക്ഷകള്‍ എഴുതുന്നത്. സംസ്ഥാനത്തിനകത്തും പുറത്തുമായി 2,962 പരീക്ഷ കേന്ദ്രങ്ങളുണ്ട്. 

ഹയര്‍സെക്കന്‍ഡറി, വി.എച്ച്.എസ്.ഇ പരീക്ഷകള്‍ തുടങ്ങി. കൊവിഡ് കേസുകള്‍ കുറഞ്ഞതോടെ ആശങ്കകളില്‍ നിന്ന് അകന്നാണ് ഈ വര്‍ഷത്തെ പരീക്ഷകള്‍.4,33,325 വിദ്യാര്‍ത്ഥികളാണ് കേരളത്തിനകത്തും പുറത്തുമായി പ്ലസ്ടു പരീക്ഷ എഴുതുന്നത്. ഓപ്ഷനല്‍ വിഷയങ്ങളായ സോഷ്യോളജി, ആന്ത്രപോളജി, ഇലക്ട്രോണിക്സ് എന്നീ വിഷയങ്ങളിലായിരുന്നു ആദ്യ ദിവസത്തെ പരീക്ഷ. കൊവിഡ് കേസുകള്‍ കുറഞ്ഞെങ്കിലും കൊവിഡ് മാനദണ്ഡങ്ങളെല്ലാം പാലിച്ചായിരുന്നു പരീക്ഷ. വിദ്യാര്‍ത്ഥികളുടെയെല്ലാം താപനില പരിശോധിച്ച ശേഷം ഒന്‍പതേ മുക്കാലിന് ഹാളിലേക്ക് കയറ്റി. മാസ്‌കും സാനിറ്റൈസറും നിര്‍ബന്ധം. 10 മണി വരെയുള്ള 15 മിനിറ്റ് കൂള്‍ ഓഫ് ടൈമായിരുന്നു. തുടര്‍ന്ന് 12.30 വരെ ആദ്യ ദിവസത്തെ പരീക്ഷ. പത്താം ക്ലാസ് പരീക്ഷ കൂടി ആരംഭിക്കുന്നതോടെ അടുത്ത ഒരു മാസം സംസ്ഥാനം പരീക്ഷ ചൂടിലായിരിക്കും. 

പരീക്ഷാപ്പേടി വേണ്ട

വിദ്യാർഥികൾ പരീക്ഷാപ്പേടിയില്ലാതെ, ആത്മവിശ്വാസത്തോടെ പരീക്ഷയെ നേരിടണം. പഠിച്ച പാഠ്യഭാഗങ്ങൾ മുഴുവനായി വീണ്ടും വേഗത്തിൽ വിലയിരുത്താൻ ശ്രമിക്കണം. കണക്ക്, ഫിസിക്സ്, കെമിസ്ട്രി, കൊമേഴ്സ് എന്നിവയിലെ ചില ഭാഗങ്ങൾ ചെയ്ത് പഠിക്കേണ്ടി വരും. പരീക്ഷാ സീസണിൽ കുറഞ്ഞത് 6 മണിക്കൂറെങ്കിലും ഉറങ്ങണം. രാത്രി 11 മുതൽ പുലർച്ചെ മൂന്നുവരെയുള്ള ഏവർക്കും ഗാഢനിദ്ര ലഭിക്കുന്ന സമയത്ത് ഉറക്കമുപേക്ഷിച്ച് പഠിക്കരുത്. തുടർച്ചയായി 2 മണിക്കൂർ പഠിച്ചാൽ 10–15 മിനിറ്റ് ഇടവേള നൽകുന്നത് നല്ലതാണ്. യഥേഷ്ടം ശുദ്ധമായ വെള്ളം കുടിക്കണം. കഴിയുന്നതും നോൺ വെജിറ്റേറിയൻ, എണ്ണപ്പലഹാരങ്ങൾ, ഹോട്ടൽ ഭക്ഷണം എന്നിവ ഒഴിവാക്കണം. രാവിലെ എഴുന്നേറ്റ ഉടനെയും രാത്രി  ഉറങ്ങാൻ പോകുന്നതിന് മുമ്പും ശുദ്ധമായ വെള്ളമോ, ചെറുനാരങ്ങാ വെള്ളമോ കുടിക്കുന്നതാണ് നല്ലത്.