ലോകത്ത് ഒമിക്രോൺ കേസുകൾ വർദ്ധിക്കുന്നത് കൂടുതൽ അപകടകരമായ മറ്റൊരു വകഭേദം ഉയർന്നുവരാനുള്ള സാദ്ധ്യത വർദ്ധിപ്പിക്കുമെന്ന് ലോകാരോഗ്യ സംഘടന.

ഡെൽറ്റ വകഭേദത്തേക്കാൾ വ്യാപക ശേഷി കൂടുതലാണെങ്കിലും ഒമിക്രോൺ പൊതുവെ അപകടകാരിയല്ലെന്നാണ് ഇതുവരെയുള്ള കണക്കു കൂട്ടൽ. എന്നാൽ ഒമിക്രോൺ വെറും ജലദോഷമല്ലെന്നും അതിനെ നിസാരമായി കാണരുതെന്നും ഡബ്ല്യു.എച്ച്.ഒ മുന്നറിയിപ്പ് നല്കി. ഡെൽറ്റയേക്കാൾ രോഗ തീവ്രത കുറവാണെങ്കിലും ഒമിക്രോൺ ബാധിച്ച് ജീവൻ നഷ്ടപ്പെടുന്നവരുടെ എണ്ണം നിസാരമല്ലെന്നും ലോകാരോഗ്യ സംഘടന നിരീക്ഷിച്ചു. ഒമിക്രോൺ വകഭേദം കൂടുതൽ പേരിലേക്കെത്തുന്നത് പുതിയ വകഭേദത്തിനുള്ള സാധ്യത വർദ്ധിപ്പിക്കുന്നതായും ഡെൽറ്റയേക്കാൾ അപകടകാരിയല്ലെങ്കിലും ഇനി വരാനിരിക്കുന്ന വകഭേദം എപ്രകാരമായിരിക്കുമെന്ന് ഇപ്പോൾ പറയാൻ സാധിക്കില്ലെന്നും ഡബ്ല്യു.എച്ച്.ഒയിലെ മുതിർന്ന ഉദ്യോഗസ്ഥ കാതറീൻ സ്മാൽവുഡ് പറഞ്ഞു.

ചുമ, ക്ഷീണം, ജലദോഷം എന്നിവയാണ് വ്യാപകമായി കണ്ടുവരുന്ന ഒമിക്രോൺ ലക്ഷണങ്ങളെന്ന് യു.എസ് സെന്റർ ഫോർ ഡിസീസ് കൺട്രോൾ ആൻഡ് പ്രിവൻഷൻ പറയുന്നു. എന്നാൽ ഇതു കൂടാതെ ഛർദ്ദി,​ വിശപ്പില്ലായ്മ എന്നിവയും ഇത്തരം രോഗികളിൽ വ്യാപകമായി കണ്ടു വരുന്നു. അതേ സമയം ഒമിക്രോൺ കേസുകൾ കൂടി വരുന്ന സാഹചര്യത്തിൽ കഴിഞ്ഞയാഴ്ച യൂറോപ്പിൽ മാത്രം 50 ലക്ഷം പേർക്കാണ് രോഗബാധ സ്ഥിരീകരിച്ചത്. ലോകരാജ്യങ്ങളിൽ കേസുകൾ വർദ്ധിക്കുന്നതിനാൽ കൊവിഡ് രോഗികൾക്ക് 14 ദിവസത്തെ ക്വാറന്റൈൻ ശുപാർശ ചെയ്യുന്നതായി ഡബ്ല്യു.എച്ച്.ഒ അറിയിച്ചു.

7 ദിവസത്തിനുള്ളിൽ സുഖം പ്രാപിച്ചാലും കൊവിഡ് രോഗികൾക്ക് 14 ദിവസത്തെ ക്വാറന്റൈൻ നിർബന്ധമാണ്. രാജ്യങ്ങൾ അവരുടെ സാഹചര്യങ്ങളെ അടിസ്ഥാനമാക്കി ക്വാറന്റൈൻ കാലാവധിയെക്കുറിച്ച് തീരുമാനമെടുക്കണം. കുറഞ്ഞ അണുബാധയുള്ള രാജ്യങ്ങളിലാണെങ്കിലും കൂടുതൽ ക്വാറന്റൈൻ സമയം നടപ്പിലാക്കുന്നത് കേസുകളുടെ എണ്ണം കുറയ്ക്കാൻ സഹായിക്കുമെന്ന് സംഘടന നിരീക്ഷിച്ചു.