കണ്ണൂർ: വരുന്ന ഡിസംബറോടെ കണ്ണൂരിൽ സിറ്റി ഗ്യാസ് പൈപ്പ്‌ലൈൻ പദ്ധതിയുടെ ഭാഗമായി വീടുകളിൽ പൈപ്പ് വഴി നേരിട്ട് പാചക വാതകമെത്തും. തുടക്കത്തിൽ കൂടാളി പഞ്ചായത്തിലെ വിവിധ വാർഡുകളിലെ വീടുകളിലായിരിക്കും പാചകവാതകമെത്തുക. മാർച്ച് മാസത്തോടെ കണ്ണൂർ കോർപ്പറേഷൻ പരിധിയിലെ വീടുകളിലും ആവശ്യക്കാർക്ക് കണക്‌ഷൻ നൽകും.

കൊച്ചി മുതൽ മംഗളൂരു വരെയുള്ള ഗെയിൽ പൈപ്പ് ലൈൻ പദ്ധതി നേരത്തേ പൂർത്തിയായിരുന്നു. ലൈനിൽനിന്ന് വീടുകളിലേക്ക് ഗ്യാസെത്തിക്കുന്ന ഇന്ത്യൻ ഓയിൽ അദാനി ഗ്യാസ്‌ പ്രൈവറ്റ് ലിമിറ്റഡിന്റെ പദ്ധതിയാണ് സിറ്റി ഗ്യാസ്. പദ്ധതിയുടെ ജില്ലയിലെ ആദ്യത്തെ ചാർജിങ്‌ സ്റ്റേഷനാണ് കൂടാളിയിലേത്. അവിടെനിന്ന്‌ കണ്ണൂർ ടൗണിലേക്കാണ് പൈപ്പ് വലിക്കുക. എട്ടിഞ്ച് കനമുള്ള പൈപ്പിൽ കണ്ണൂർ നഗരമേഖലയിലെത്തുന്ന വാതകം പിന്നീട് നിശ്ചിതമർദത്തിൽ ആവശ്യക്കാർക്ക് വീടുകളിലേക്ക് നൽകും. കണ്ണൂരിൽനിന്ന്‌ തലശ്ശേരി, തളിപ്പറമ്പ് തുടങ്ങിയ മേഖലകളിലേക്ക് പൈപ്പ് നീട്ടും. വീടുകളിലേക്ക് കൊണ്ടുപോകുന്നത് അരയിഞ്ച് കനമുള്ള പോളി എത്തിലീൻ പൈപ്പുവഴിയാണ്‌.

ലാഭകരം, അപകടം കുറവ്‌

എൽ.പി.ജി.യെക്കാൾ ലാഭകരമാണ് പ്രകൃതിവാതകം. ഏകദേശം 30 ശതമാനം ലാഭമുണ്ടാകുമെന്നാണ് കണക്ക്. അതോടൊപ്പം എൽ.പി.ജി.യെക്കാൾ അപകടം കുറവുമാണ് പ്രകൃതിവാതകത്തിന്‌. ആവശ്യക്കാർക്ക്‌ ഒരേ സ്റ്റൗവിൽതന്നെ എൽ.പി.ജി. സിലിൻഡറും പ്രകൃതിവാതകവും ഉയോഗിക്കാം.

ഇതിനായി പ്രത്യേക നോബ് ഘടിപ്പിക്കേണ്ടിവരും. ഇത് കമ്പനിതന്നെ ഏർപ്പാടാക്കും. രണ്ടുമാസം കൂടുമ്പോഴാണ് ബില്ല് വരിക. കണക്‌ഷനെടുക്കാൻ ഇന്നത്തെ കണക്കുപ്രകാരം 7000 രൂപ സെക്യൂരിറ്റി ഡിപ്പോസിറ്റ് വേണ്ടിവരും. പിന്നീട് കണക്‌ഷൻ വേണ്ടെന്ന് വെച്ചാൽ നിക്ഷേപം തിരിച്ചുനൽകും. എറണാകുളത്ത് 5000 വീടുകളിൽ കണക്‌ഷൻ നൽകിക്കഴിഞ്ഞു. തുടക്കത്തിൽ നഗരകേന്ദ്രീകൃതമായ സ്ഥലങ്ങളിലാണ് സിറ്റി ഗ്യാസ് പദ്ധതി നടപ്പാക്കുക.

കണ്ണൂരിൽ ആറ്‌ സ്റ്റേഷനുകൾ

കൂടാളിക്കുപുറമെ കടവത്തൂർ, ഓലായിക്കര, മാത്തിൽ, അമ്മാനപ്പാറ, ബാവുപ്പറമ്പ് എന്നിവിടങ്ങളിലാണ് ചാർജിങ്‌ സ്റ്റേഷനുകൾ. ജില്ലയിൽ 53 വില്ലേജുകളിലെ 82 കിലോമീറ്റർ പ്രദേശത്തുകൂടിയാണ് ഗെയിൽ പൈപ്പ് ലൈൻ കടന്നുപോകുന്നത്‌. സിറ്റി പൈപ്പ് ലൈൻ വ്യാപകമാവുന്നതോടെ ജില്ലയിലെ എൽ.പി.ജി. സിലിൻഡർ ക്ഷാമം പരിഹരിക്കപ്പെടും. അതേസമയം നഗരങ്ങളിൽനിന്ന്‌ വിദൂരങ്ങളായ ഗ്രാമപ്രദേശങ്ങളിൽ പൈപ്പ്‌ലൈൻ എത്തുന്നതിന്‌ വർഷങ്ങൾ വേണ്ടിവരുമെന്നാണ് കണക്കുകൂട്ടുന്നത്.