കേളകം: മനുഷ്യ – വന്യമൃഗ സംഘർഷങ്ങൾ നിയന്ത്രിക്കാൻ പഞ്ചായത്തുകൾക്ക് അധികാരം നൽകണമെന്ന് സെന്റർ ഫോർ ഡെവലപ്മെന്റ്‌ ​ സ്​റ്റഡീസ് പ്രഫസറും ചരിത്രകാരിയുമായ ഡോ. ജെ. ദേവിക. ഫെയർ ട്രേഡ് അലയൻസ് കേരളയുടെയും കേളകം പ്രസ് ഫോറത്തി​ൻെറയും നേതൃത്വത്തിൽ ജനപ്രതിനിധികൾ, കർഷക സംഘടന നേതാക്കൾ, വനം വകുപ്പ് ഉദ്യോഗസ്ഥർ, പരിസ്ഥിതി പ്രവർത്തകർ എന്നിവരുമായി നടത്തിയ ചർച്ചയിൽ സംസാരിക്കുകയായിരുന്നു അവർ. മനുഷ്യരും വന്യമൃഗങ്ങളും തമ്മിലുള്ള സംഘർഷങ്ങൾ അവസാനിപ്പിക്കുന്നതിനുതകുന്ന നയരൂപവത്കരണത്തിന് കാടതിർത്തി പഞ്ചായത്തുകളുടെ സംഘടിത ശ്രമങ്ങൾ അനിവാര്യമാണെന്നും അവർ പറഞ്ഞു.

മനുഷ്യ – വന്യജീവി സംഘർഷങ്ങളിൽ പഞ്ചായത്തിരാജ് നിയമങ്ങൾ എങ്ങനെ ഫലപ്രദമായി നടപ്പാക്കാമെന്ന സെന്റർ ഫോര്‍ ​ഡെവലപ്മെന്റ്‌​ സ്​റ്റഡീസ് പഠനങ്ങളുടെ ഭാഗമായി കർഷകരുമായും പഞ്ചായത്ത് ജനപ്രതിനിധികളുമായും സംവദിക്കാനെത്തിയതായിരുന്നു അവർ. ജീവനും സ്വത്തിനും ഭീഷണിയുയർത്തുന്ന കാട്ടുപന്നികളെ കൊല്ലുന്നതിന് ആദിവാസികൾക്ക് അനുമതി നൽകണം. ഇവയെ കുഴിച്ചുമൂടാതെ ഭക്ഷണമാക്കാനുള്ള അനുമതിക്ക്​ ശിപാർശ ചെയ്യുമെന്നും ജെ. ദേവിക പറഞ്ഞു.

കണിച്ചാർ പഞ്ചായത്ത് പ്രസിഡൻറ്​ ആൻറണി സെബാസ്​റ്റ്യൻ, കേളകം പഞ്ചായത്ത് സ്ഥിരം സമിതി ചെയർമാന്മാരായ ടോമി പുളിക്കക്കണ്ടം, സജീവൻ പാലുമ്മി, ബ്ലോക്ക് പഞ്ചായത്ത് അംഗങ്ങളായ മൈഥിലി രമണൻ, ഇന്ദിര ശ്രീധരൻ, ഫെയർ ട്രേഡ് അലയൻസ് സംസ്ഥാന ചെയർമാൻ തോമസ് കളപ്പുര, ചീഫ് പ്രമോട്ടർ ടോമി മാത്യു നടവയൽ, കൊട്ടിയൂർ റേഞ്ച് ഫോറസ്​റ്റ്​ ഓഫിസർ സുധീർ നരോത്ത്, മണത്തണ സെക്​ഷൻ ഫോറസ്​റ്റർ മഹേഷ്, കേളകം പ്രസ്ഫോറം പ്രസിഡൻറ്​ കെ.എം. അബ്​ദുൽ അസീസ്, ഭാരവാഹികളായ ജോയി ജോസഫ്, എം.ജെ. റോബിൻ, സജീവ് നായർ, അനീഷ് അഗസ്​റ്റിൻ, കർഷക പ്രതിനിധികൾ തുടങ്ങിയവർ പങ്കെടുത്തു.  സണ്ണി ജോസഫ് എം.എൽ.എയുമായി ജെ. ദേവിക കൂടിക്കാഴ്ച നടത്തി നിർദേശങ്ങൾ സ്വീകരിച്ചു.