കണ്ണൂർ : ആഫ്രിക്കയിൽ കടൽക്കൊള്ളക്കാരുടെ ആക്രമണത്തിൽ ഇന്ത്യൻ കപ്പലിൽ കടലിൽ കുടുങ്ങിയവരിൽ കണ്ണൂർ സ്വദേശിയും. മരക്കാർക്കണ്ടി ‘ശ്രീസുകുമ’യിൽ മർച്ചന്റ്‌ നേവി ഉദ്യോഗസ്ഥൻ വി. ഉദയരാജന്റെയും മനിയുടെയും മകൻ ദീപക്‌ ഉദയരാജാണ്‌ ആഫ്രിക്കയിൽ കടൽക്കൊള്ളക്കാരുടെ ആക്രമണത്തിനിരയായ ഒ.എസ്‌.വി. ടെമ്പൻ കപ്പലിലുള്ളത്‌. 17 ജീവനക്കാരുമായി കാമറൂണിൽനിന്ന്‌ മുംബൈയിലേക്ക്‌ തിരിച്ചുവരുമ്പോഴാണ്‌ ആക്രമണത്തിനിരയായത്‌. എൻജിൻ തകരാറായതിനെത്തുടർന്ന്‌ നങ്കൂരമിട്ട കപ്പലിനെ ശനിയാഴ്‌ച അർധരാത്രി കൊള്ളക്കാർ വളയുകയായിരുന്നു. രണ്ടുപേരെ വെടിവയ്‌ക്കുകയും ഒരാളെ തട്ടിക്കൊണ്ടുപോകുകയുംചെയ്‌തു.
സെക്കൻഡ്‌ ഓഫീസറായ ദീപക്‌ ഉദയരാജും ക്യാപ്‌റ്റനുമടക്കം 14 പേരാണ്‌ കപ്പലിൽ കുടുങ്ങിയത്‌. വെടിയേറ്റ രണ്ടുപേരും ചികിത്സയിലാണ്‌. തട്ടിക്കൊണ്ടുപോയ ജീവനക്കാരനെക്കുറിച്ച്‌ വിവരമില്ല. കടലിൽ കുടുങ്ങിയ വിവരം ദീപക്കാണ്‌ അച്ഛൻ ഉദയരാജനെ ഫോണിൽ അറിയിച്ചത്‌. യന്ത്രത്തകരാറ്‌ മാറ്റി കപ്പലുമായി ദുബായിലേക്കെത്താനാണ്‌ കമ്പനിയുടെ നിർദേശം. കടൽക്കൊള്ളക്കാരുടെ വിഹാര കേന്ദ്രത്തിലൂടെ വരാൻ ധൈര്യമില്ലാത്തതിനാൽ ജീവനക്കാർ അതിന്‌ തയ്യാറായിട്ടില്ല. എല്ലാ സന്നാഹങ്ങളോടുംകൂടി പകരം കപ്പലുമായി എത്തി രക്ഷപ്പെടുത്തണമെന്നാണ്‌ ജീവനക്കാരുടെ ആവശ്യം.

ബി.എസ്‌.സി. നോട്ടിക്കൽ സയൻസ്‌ പഠനം പൂർത്തിയാക്കിയ ദീപക്‌ ഉദയരാജ്‌ മലേഷ്യയിലും കൊച്ചി- ലക്ഷദ്വീപ്‌ പാസഞ്ചറിലും ജേലിചെയ്‌തശേഷം ആറുമാസംമുമ്പാണ്‌ ഒ.എസ്‌.വി. ടെമ്പനിൽ ജോലിയിൽ പ്രവേശിച്ചത്‌. കാമറൂണിൽനിന്ന്‌ മുംബൈയിലെത്തിയാലുടൻ കണ്ണൂരിലെ വീട്ടിലേക്ക്‌ വരാൻ തീരുമാനിച്ചപ്പോഴാണ്‌ കൊള്ളക്കാരുടെ കെണിയിൽ കുടുങ്ങിയത്‌. കപ്പൽ കമ്പനി ഇടപെട്ടില്ലെങ്കിൽ മകനുൾപ്പെടെയുള്ളവരുടെ തിരിച്ചുവരവ്‌ പ്രതിസന്ധിയിലാകുമെന്ന്‌ 25 വർഷത്തിലധികം വിവിധ രാജ്യങ്ങളിൽ മർച്ചന്റ്‌ നേവിയിൽ ജോലിചെയ്‌ത ഉദയരാജൻ പറഞ്ഞു. മകന്റെ രക്ഷയ്‌ക്ക്‌ ഇടപെടണമെന്നാവശ്യപ്പെട്ട്‌ സി.പി.എം. കണ്ണൂർ ജില്ലാ സെക്രട്ടറി എം.വി. ജയരാജൻമുഖേന മുഖ്യമന്ത്രിക്ക്‌ നിവേദനം നൽകി. ഡോ. വി. ശിവദാസൻ എം.പി.ക്കും നിവേദനം നൽകിയിട്ടുണ്ട്‌. അടിയന്തര രക്ഷാനടപടി സ്വീകരിക്കണമെന്നാവശ്യപ്പെട്ട് കപ്പലിന്റെ ക്യാപ്റ്റൻ സുനിൽകുമാർ ഇന്ത്യൻ എംബസിക്കും വിദേശകാര്യമന്ത്രാലയത്തിനും സന്ദേശമയച്ചു.