കണ്ണൂർ : നെൽവയൽ നികത്തുന്നവർക്കെതിരെ കർശന നടപടി സ്വീകരിക്കുമെന്ന് ജില്ലാ വികസന സമിതി യോഗത്തിൽ തദ്ദേശ മന്ത്രി എം.വി. ഗോവിന്ദൻ. ജില്ലയുടെ കിഴക്കൻ മേഖലയിൽ വൻതോതിൽ വയലുകൾ നികത്തുന്നതായി പരാതി ഉയർന്നിരുന്നു. വയൽ നികത്തുന്നത് തടയാൻ പരിശോധന വ്യാപകമാക്കാനും മന്ത്രി നിർദേശം നൽകി.
ആറളം, പേരാവൂർ, കണിച്ചാർ മേഖലയിൽ പട്ടിക വർഗക്കാരായ വിദ്യാർഥികളുടെ ഓൺലൈൻ വിദ്യാഭ്യാസത്തിന്റെ പുരോഗതി വിലയിരുത്താൻ ഉടൻ യോഗം ചേരാനും മന്ത്രി നിർദേശിച്ചു. പഠനോപകരണങ്ങൾ ലഭിച്ചവരുടെയും ശേഷിക്കുന്നവരുടെയും കണക്കുകൾ ഉദ്യോഗസ്ഥർ സമർപ്പിക്കണം. മന്ത്രിയുടെ നേതൃത്വത്തിൽ കലക്ടർ, ജനപ്രതിനിധികൾ, വകുപ്പ് ഉദ്യോഗസ്ഥർ എന്നിവരെ ഉൾപ്പെടുത്തിയാണ് അവലോകന യോഗം ചേരുക. വിമാനത്താവളം അനുബന്ധ റോഡുകളുടെ പ്രവൃത്തി വേഗത്തിലാക്കുന്നതിന്‌ മുഖ്യമന്ത്രി പിണറായി വിജയന്റെ സാന്നിധ്യത്തിൽ മുതിർന്ന ഉദ്യോഗസ്ഥരുടെ യോഗം ചേരും.

സർക്കസ് കലാകാരന്മാർക്കുള്ള പെൻഷൻ തുക വർധിപ്പിക്കുന്ന വിഷയം കായിക വകുപ്പിനെ അറിയിച്ചു. കിടപ്പിലായ അമ്പതോളം കലാകാരന്മാരുടെ പെൻഷൻ മണിയോർഡറായി വീടുകളിൽ എത്തിക്കും. വേങ്ങാട്ടെ സംസ്ഥാന വിത്തുൽപാദന കേന്ദ്രത്തിന്റെ പ്രവർത്തനം കാര്യക്ഷമമാക്കാൻ കൂടുതൽ തൊഴിലാളികളെ നിയമിക്കുന്നതിന് ഫാം സൂപ്രണ്ടിന് നിർദേശം നൽകി.

ജില്ലാ ആശുപത്രിയിൽ അനുവദിച്ച സ്‌പെഷ്യാലിറ്റി ബ്ലോക്കിന്റെ നിർമാണം വേഗത്തിലാക്കും. അംബേദ്കർ ഗ്രാമം പദ്ധതിയിലുൾപ്പെടുത്തി പട്ടത്തുവയൽ എസ്ടി കോളനി പ്രവൃത്തി ഒരു മാസത്തിനകം പൂർത്തിയാക്കും. പട്ടുവത്തെ മണ്ണിടിച്ചിൽ രൂക്ഷമായ പ്രദേശങ്ങളിലുള്ളവരെ മാറ്റി താമസിപ്പിക്കാൻ തളിപ്പറമ്പ് താലൂക്ക് തഹസിൽദാരോട് നിർദേശിച്ചു. ആറ് കുടുംബങ്ങളെ പുനരധിവസിപ്പിക്കാൻ ഉടൻ നടപടി ആരംഭിക്കും. യോഗത്തിൽ കലക്ടർ ടി.വി. സുഭാഷ്‌ അധ്യക്ഷനായി. ഡോ. വി. ശിവദാസൻ എം.പി, എം.എൽ.എ.മാരായ രാമചന്ദ്രൻ കടന്നപ്പള്ളി, കെ.പി. മോഹനൻ, കെ.വി. സുമേഷ്, സജീവ് ജോസഫ്, ടി.ഐ. മധുസൂദനൻ, ജില്ലാ പഞ്ചായത്ത് പ്രസിഡന്റ്‌ പി.പി. ദിവ്യ, മുഖ്യമന്ത്രിയുടെ മണ്ഡലം പ്രതിനിധി പി. ബാലൻ, എ.ഡി.എം.കെ. കെ. ദിവാകരൻ, ഡി.പി.ഒ കെ. പ്രകാശൻ, ഉദ്യോഗസ്ഥർ എന്നിവർ പങ്കെടുത്തു.