കല്പറ്റ: കൈനാട്ടിയിൽ സ്കൂട്ടർ മറിഞ്ഞ് യുവതി മരിച്ചു. മുട്ടിൽ കുട്ടമംഗലത്ത് ആർ.കെ. നിവാസിൽ രഞ്ജിത കൃഷ്ണൻ (28) ആണ് മരിച്ചത്. വെള്ളിയാഴ്ച വൈകിട്ട് 5.30 ഓടെയായിരുന്നു അപകടം. സ്കൂട്ടർ മറിയുകയും രഞ്ജിത റോഡിൽ തലയടിച്ച് വീഴുകയുമാണുണ്ടായതെന്ന് ദൃക്സാക്ഷികൾ പറഞ്ഞു.ഉടൻ കല്പറ്റയിലെ സ്വകാര്യ ആസ്പത്രിയിൽ എത്തിച്ചെങ്കിലും മരണപ്പെട്ടു. അച്ഛൻ: രാമകൃഷ്ണൻ. അമ്മ: രാധാമണി.മുൻപ് കണ്ണവം തൊടീക്കളത്തായിരുന്നു ഇവർ താമസിച്ചിരുന്നത്.

ന്യൂമാഹി: വടകര ലോക്‌സഭ മണ്ഡലം എൽ.ഡി.എഫ്‌ സ്ഥാനാർഥി കെ.കെ ശൈലജക്കെതിരെ വ്യാജ വീഡിയോ പ്രചരിപ്പിച്ച മുസ്ലിംലീഗ്‌ നേതാവ്‌ അറസ്‌റ്റിൽ.യു.ഡി.എഫ്‌ ന്യൂമാഹി പഞ്ചായത്ത്‌ ചെയർമാനും ഒൻപതാം വാർഡ് പഞ്ചായത്ത് അംഗവുമായ പെരിങ്ങാടി പുളിയുള്ളതിൽ പീടികയിലെ ടി.എച്ച്‌. അസ്ലമിനെയാണ് (36) ന്യൂമാഹി പൊലീസ്‌ അറസ്‌റ്റ്‌ ചെയ്‌തത്‌. സമുദായ സ്‌പർധയുണ്ടാക്കാൻ ശ്രമിച്ചതടക്കമുള്ള വകുപ്പുകൾ ചേർത്താണ്‌ കേസ്.

മുസ്ലിം ജനവിഭാഗമാകെ വർഗീയവാദികളാണെന്ന്‌ എൽ.ഡി.എഫ്‌ സ്ഥാനാർഥി പറഞ്ഞതായി ന്യൂമാഹിയിലെ മങ്ങാട്‌ സ്‌നേഹതീരം വാട്‌സ്‌ ആപ്പ്‌ ഗ്രൂപ്പിലാണ്‌ പ്രതി വ്യാജ വീഡിയോ ഉണ്ടാക്കി പോസ്‌റ്റ്‌ ചെയ്‌തത്‌. സ്വകാര്യ ചാനലിലെ അഭിമുഖം എഡിറ്റ്‌ ചെയ്‌ത്‌ തയാറാക്കിയ വീഡിയോയാണ്‌ ടി.എച്ച്‌. അസ്ലം പ്രചരിപ്പിച്ചത്‌.
സൈബർ സെല്ല്‌ മുഖേന വീഡിയോയുടെ ആധികാരികത ഉറപ്പ്‌ വരുത്തിയ ശേഷമാണ്‌ അറസ്‌റ്റ്‌.

ഫേസ്‌ബുക്കിലൂടെ കെ.കെ. ശൈലജക്കും കുടുംബത്തിനുമെതിരെ വ്യാജ പ്രചാരണം നടത്തിയ കേസിൽ കാസർകോട്‌ സ്വദേശി എം.പി. ജാഫറിനെ കതിരൂർ പൊലീസ്‌ പ്രതിചേർത്തു. പ്രോഗ്രസീവ്‌ മൈൻഡ്‌ ഫേസ്‌ബുക്ക്‌ പേജിലൂടെയാണ്‌ ടീച്ചറെയും കുടുംബത്തെയും ഇയാൾ അധിക്ഷേപിച്ചത്‌. ‘സമകാലികം’ വാട്‌സ്‌ആപ്പ്‌ ഗ്രൂപ്പിൽ സ്ഥാനാർഥിക്കെതിരെ വ്യാജ മെസേജ്‌ അയച്ചത്‌ കർണാടക–-കേരള അതിർത്തി ഗ്രാമമായ ഷേണി സ്വദേശി റാഷിദ്‌ ആണെന്ന്‌ തെളിഞ്ഞതായി കതിരൂർ പൊലീസ്‌ അറിയിച്ചു.

മട്ടന്നൂർ: കെ.കെ.ശൈലജക്കെതിരെ ഫേസ്ബുക്കിൽ അശ്ലീല പോസ്റ്റിട്ട കോഴിക്കോട്സ്വദേശിക്കെതിരെ മട്ടന്നൂർ പോലീസ് കേസെടുത്തു. നടുവണ്ണൂർ പാലോളി കോട്ടീന്റെ മീത്തൽ കെ.എം.മിൻഹാജിനെതിരെയാണ് കലാപാഹ്വാനം അടക്കമുള്ള വകുപ്പുകൾ ചേർത്ത് കേസെടുത്തത്.കെ.കെ.ശൈലജയുടെ ചിത്രം മോർഫ് ചെയ്താണ് ഇയാൾ ഫേസ്ബുക്കിലൂടെ വ്യാജ പോസ്റ്റിട്ടത്.ഐ.പി.സി 153, 509, കേരള പോലീസ് ആക്ട് 120(ഒ) എന്നീ വകുപ്പുകൾ ചുമത്തിയാണ് കേസ്.