കൂത്തുപറമ്പ്: ലോക്‌ഡൗൺ കാലത്ത് സഹജീവികൾക്ക് കൈത്താങ്ങായ പാട്യം ഗവ. ഹയർ സെക്കൻഡറി സ്കൂളിലെ സ്റ്റുഡന്റ് പൊലീസ് കേഡറ്റിന് സംസ്ഥാന അംഗീകാരം. കണ്ണൂർ സിറ്റി ജില്ലാ നോഡൽ ഓഫീസിനുകീഴിൽ മികച്ച പ്രവർത്തനത്തിനുള്ള ഒന്നാം സ്ഥാനത്തിനും പാട്യം സ്കൂളിലെ കുട്ടിപ്പൊലീസ് അർഹരായിരുന്നു. ജില്ലയിൽ നിന്നുള്ള മികച്ച യൂണിറ്റായാണ്‌ പാട്യം സ്കൂളിലെ എസ്‌.പി.സി.യെയും തെരഞ്ഞെടുത്തത്‌.

ലോക്‌ഡൗൺ കാലത്ത് 76 ഓളം പ്രവർത്തനങ്ങൾ സംഘടിപ്പിച്ചു. 2018 ലാണ് പാട്യത്ത് യൂണിറ്റ് ആരംഭിക്കുന്നത്. ‘ഒരു വയറൂട്ടം’ എന്ന പദ്ധതിയിലൂടെ തലശേരി ജനറൽ ആശുപത്രിയിലെ രോഗികൾക്കും കൂട്ടിരിപ്പുകാർക്കും കോവിഡ് ബാധിതർക്കും കേഡറ്റുകളുടെ വീട്ടിൽനിന്ന് ഭക്ഷണമെത്തിച്ച് നൽകി. പൂക്കോട്ടെ അപൂർവരോഗം ബാധിച്ച പാർവതിയുടെ ചികിത്സാ സഹായത്തിനായി 50,000 രൂപയും സമാഹരിച്ച് നൽകി. ‘പുത്തനുടുപ്പും പുസ്തകവും’ എന്ന പദ്ധതിയിലൂടെ അനാഥാലയങ്ങളിലെ കുട്ടികൾക്ക് സഹായമെത്തിച്ചു. ഭിന്നശേഷിക്കാരായ കുട്ടികൾക്ക് ഭക്ഷ്യധാന്യ കിറ്റ്‌, രക്തദാനസേന, ചിമ്മാലിമൊട്ടയിലെ തടയണ നിർമാണം എന്നീ പ്രവർത്തനങ്ങളും നടത്തി.

ജനപ്രതിനിധികളുമായി സംവദിക്കാൻ ‘സാരഥികൾക്കൊപ്പം’, ക്യാൻസർ രോഗികൾക്ക് കേശദാനത്തിനായി ഷെയർ കട്ട്, പഠനോപകരണങ്ങൾ തലമുറ കൈമാറാൻ ‘ബുക്ക് ബാങ്ക്‌’ തുടങ്ങിയവയും സംഘടിപ്പിച്ചു‌. സി.പി.ഒ. വി.കെ. ഹരീഷ്, എ.സി.പി.ഒ.   ജി. ആര്യ എന്നിവരുടെ നേതൃത്വത്തിലുള്ള പ്രവർത്തനങ്ങൾക്ക്‌ പ്രധാനാധ്യാപകൻ ബാബു മഹേശ്വരി പ്രസാദ്, പി.ടി.എ. പ്രസിഡന്റ്‌ കെ.പി. സതീഷ് കുമാർ തുടങ്ങിയവരുടെ സഹായവുമുണ്ട്‌. അസി. ഡിസ്‌ട്രിക്ട്‌ നോഡൽ ഓഫീസർ കെ. രാജേഷാണ്‌ മേൽനോട്ടം വഹിക്കുന്നത്‌.