പേരാവൂർ:പേരാവൂർ ബ്ലോക്കിലെ വിവിധ പഞ്ചായത്തുകളിൽ കോവിഡ് വ്യാപനം കൂടിയിട്ടും പല പഞ്ചായത്തുകളിലും കോവിഡ് ടെസ്റ്റുകൾ കാര്യക്ഷമമായി നടത്തുന്നില്ലെന്ന് ആക്ഷേപം.കഴിഞ്ഞ ഒരാഴ്ചത്തെ രോഗ നിർണ്ണയ പരിശോധനയിൽ 1078 ടെസ്റ്റുകൾ പേരാവൂർ പഞ്ചായത്തിൽ നടത്തിയപ്പോൾ കൊട്ടിയൂർ പഞ്ചായത്തിൽവെറും 197 ടെസ്റ്റുകളാണ് മെയ് 11 മുതൽ 17 വരെയുള്ള ദിവസങ്ങളിൽ നടത്തിയത്.

ചില പഞ്ചായത്തുകളിലെ ആരോഗ്യവകുപ്പ് പ്രവർത്തകർ വേണ്ടത്ര ശ്രദ്ധ രോഗ നിർണ്ണയ ടെസ്റ്റിന് നൽകുന്നില്ലെന്ന ആരോപണം ശക്തിപ്പെടുത്തുന്നതാണ് കണക്കുകൾ.ഏകദേശം ഓരോ ആഴ്ചയിലെയും ശരാശരി ടെസ്റ്റുകളുടെ കണക്കും മലയോര പഞ്ചായത്തുകളിൽ ഭിന്നമല്ല.

കണിച്ചാർ പഞ്ചായത്തിൽ 279 ഉം കേളകത്ത് 334 ഉം മാലൂരിൽ 368 ഉം മുഴക്കുന്നിൽ 388 ഉം ടെസ്റ്റുകൾ നടത്തിയപ്പോൾ കോളയാടിൽ 585 ടെസ്റ്റുകളുമാണ് ഈ ദിവസങ്ങളിൽനടത്തിയത്.368 ടെസ്റ്റുകൾ നടത്തിയ മാലൂർ പഞ്ചായത്തിലാണ് ടെസ്റ്റ് പോസിറ്റിവിറ്റി നിരക്ക് കൂടുതൽ.50.82 ശതമാനമാണ് മാലൂർ പഞ്ചായത്തിലെ ടിപി.ആർ.ഏറ്റവും കൂടുതൽ ടെസ്റ്റ് നടത്തിയ പേരാവൂരിൽ 32.56 ശതമാനവും ഏറ്റവും കുറവ് ടെസ്റ്റ് നടത്തിയ കൊട്ടിയൂരിൽ 43.15 ശതമാനവുമാണ് കഴിഞ്ഞ ഒരാഴ്ചത്തെ ശരാശരി ടി.പി.ആർ.കണിച്ചാർ 35.84,കേളകം 27.25,മുഴക്കുന്ന് 35.82,കോളയാട് 33.68 ശതമാനവുമാണ് ടി.പി.ആർ.

കോവിഡ് വ്യാപനത്തെ തുടർന്ന് മെയ് മാസമാദ്യം പ്രാദേശിക ലോക്ഡൗൺ ഏർപ്പെടുത്തിയ പഞ്ചായത്തുകളാണ് കൊട്ടിയൂർ,കേളകം,കണിച്ചാർ,

പേരാവൂർ,കോളയാട്,മുഴക്കുന്ന് എന്നിവ.എന്നാൽ,ഭൂരിഭാഗം പഞ്ചായത്തുകളിലും കോവിഡ് ടെസ്റ്റ് കാര്യക്ഷമമായി നടത്തുന്നില്ല എന്നാണ് ദിവസവും നടക്കുന്ന ടെസ്റ്റുകളുടെ എണ്ണം സൂചിപ്പിക്കുന്നത്.

ടെസ്റ്റുകൾ കാര്യക്ഷമമായി നടത്തിയാൽ മാത്രമേ ഓരോ പഞ്ചായത്ത് പരിധിയിലെയും രോഗ വ്യാപനത്തിന്റെ തോത് മനസിലാക്കാൻ സാധിക്കൂ എന്നിരിക്കെ,ആരോഗ്യവകുപ്പിന്റെയും തദ്ദേശഭരണസമിതികളുടെയും പ്രവർത്തനം ഇനിയും കാര്യക്ഷമമാക്കേണ്ടി വരും.