കൂത്തുപറമ്പ്: ഗവ. താലൂക്ക് ആശുപത്രിയിൽ ആരംഭിച്ച കോവിഡ് ട്രയാജ് സെന്ററിൽ പരിശോധനയ്ക്കായി എത്തുന്നവരുടെ എണ്ണം വർധിച്ചു. നഗരസഭയിൽ നിന്നും സമീപ പഞ്ചായത്തുകളായ പാട്യം, കോട്ടയം, പിണറായി, വേങ്ങാട്, മാങ്ങാട്ടിടം, ചിറ്റാരിപ്പറമ്പ്, കോളയാട് എന്നിവിടങ്ങളിൽ നിന്നും കോവിഡ് പരിശോധനയ്ക്കായി ഒട്ടേറെ പേരാണ് ട്രയാജ് സെന്ററിൽ എത്തുന്നത്. പരിശോധന കാര്യക്ഷമമാക്കാൻ ആന്റിജൻ ടെസ്റ്റ് ചെയ്യാനുള്ള സൗകര്യവും സെന്ററിൽ ഒരുക്കിയിട്ടുണ്ട്.

വിവിധ ഭാഗങ്ങളിൽ നിന്ന് ആശുപത്രിയിൽ എത്തുന്നവർക്ക് സേവനങ്ങൾ എളുപ്പത്തിൽ ലഭ്യമാക്കാൻ നഗരസഭയുടെ നേതൃത്വത്തിൽ‌ ഹെൽപ് ഡെസ്ക് ആരംഭിച്ചു. നഗരസഭാധ്യക്ഷ വി.സുജാത ഉദ്ഘാടനം ചെയ്തു. വൈസ് ചെയർമാൻ വി.രാമകൃഷ്ണൻ അധ്യക്ഷത വഹിച്ചു. സ്ഥിരം സമിതി അധ്യക്ഷരായ കെ.വി.രജീഷ്, കെ.കെ.ഷമീർ, സെക്രട്ടറി കെ.കെ.സജിത്ത് കുമാർ, താലൂക്ക് ആശുപത്രി സൂപ്രണ്ട് ഡോ.എം.പി. ജീജ എന്നിവർ പ്രസംഗിച്ചു.

കോവിഡ് പോസിറ്റീവ് ആയവർക്ക് ആവശ്യമായ സൗകര്യങ്ങൾ ഒരുക്കുന്നതിന് 3 ആംബുലൻസുകളും സമാനമായ 5 വാഹനങ്ങളും ഏർപ്പെടുത്തിയതായി നഗരസഭാധ്യക്ഷ പറഞ്ഞു. നരവൂർ സൗത്ത് എൽ.പി. സ്കൂളിൽ ആരംഭിച്ച ഡൊമിസിലറി കെയർ സെന്ററിന് പുറമേ വീടുകളിൽ സൗകര്യമില്ലാത്ത കോവിഡ് പോസിറ്റീവുകാരെ താമസിപ്പിക്കുന്നതിന് മറ്റ് കേന്ദ്രങ്ങളും ഏർപ്പെടുത്തിയിട്ടുണ്ട്.